CHADEMA ATAKA JK AINGILIE KATI BUNGE LA KATIBA.

Rais wa Jamhuri ya muungano wa Tanzania Jakaya Mrisho Kikwete
inShare

Dodoma. Chama cha Demokrasia na Maendeleo (Chadema), kimemuomba Rais Jakaya Kikwete, kuingilia kati na kukemea vitendo vya kuingiliwa kwa uhuru wa wajumbe wa Bunge Maalumu la Katiba katika kufanya uamuzi.

Kauli hiyo ilitolewa jana na Mkurugenzi wa Mawasiliano na Mahusiano wa Chadema, John Mnyika, kufuatia hatua ya Bunge hilo kuwa njia panda katika kuamua ama kutumia kura za wazi au za siri katika kupitisha katiba.

Kauli hiyo ya Chadema inatokana na Kamati ya Kuandaa Kanuni za Uendeshaji wa Bunge hilo kushindwa kuafikiana.

Wajumbe wa CCM wanashikilia msimamo wa kura za wazi na wale wa makundi na vyama vya upinzani wakitaka kura ya siri.

Wajumbe hao wa makundi wanasema hayo ni matakwa muhimu ya kidemokrasia na kwamba yatawapa wajumbe uhuru wa kufanya uamuzi.

Akizungumza na gazeti hili mjini Dodoma jana, Mnyika alisema kwa hatua ambayo suala hilo limefikia, ni vizuri Rais Kikwete akaingilia kati na kuvitaka vyama vya siasa, makundi na taasisi kuheshimu Sheria ya Mabadiliko ya Katiba.

“Tunatoa mwito kwa Rais Kikwete atumie hotuba yake ya mwisho wa mwezi Februari, ambayo bado hajaitoa, kusisitiza vyama, makundi na taasisi kuheshimu sheria hiyo kwa kutoingilia uhuru wa wajumbe katika kufanya uamuzi,”alisema Mnyika.

Mnyika alisema ni muhimu Rais akafanya hivyo kwa kuwa uteuzi wake wa wajumbe 201 uliacha shaka kwamba walioteuliwa ni viongozi na makada wengi wa CCM ili kuongeza idadi ya wajumbe wanaoweza kuingilia uhuru wao.

Mnyika pia amemsihi Rais Kikwete kutoa kauli juu ya waraka wa CCM ili wajumbe wa CCM wafanye uamuzi uhuru wa kuzikubali kura za siri.

Mnyika alisema endapo Rais hatachukua hatua hiyo sasa, Bunge Maalum la Katiba halitaweza kumaliza kazi zake ndani ya siku 70.

Alisema badala yake linaweza kumaliza kazi yake ndani ya siku 90 ikiwa njama za kuchelewesha hazitadhibitiwa.
Chanzo;Mwananchi leo

Na Mjumbe Jr

Mbozi