PUYOL MBIONI KUVUNJA MKATABA NA BARCA.

 

 Barcelona, Hispania. Nahodha wa klabu ya Barcelona, Carles Puyol amesema atavunja mkataba wake wa kuendelea kuitumikia klabu hiyo mwishoni mwa msimu huu.

Puyol (35) raia wa Hispania ana mkataba na klabu ya Barcelona mpaka 2016, lakini amekubaliana na uongozi wa klabu hiyo kuvunja mkataba huo mwishoni mwa msimu huu.

Tangu aanze kuichezea Barcelona mwaka 1999 katika Ligi Kuu ya Hispania ‘La Liga’ na mashindano mengine. Puyol ameichezea klabu hiyo katika mechi 593.

Akiwa na klabu ya Barcelona, Puyol ametwaa mataji sita ya La Liga, mataji matatu ya Ligi ya Mabingwa Ulaya na makombe mawili ya ligi ya Hispania. Pia Puyol ameisaidia Barcelona kutwaa ubingwa wa Uefa Super Cup mara mbili na Super cup ya Hispania mara sita.

Vilevile Puyol ameisaidia timu ya taifa ya Hispania kutwaa ubingwa wa Ulaya mwaka 2008 na ubingwa wa dunia 2010 katika fainali zilizofanyika nchini Afrika Kusini.

Hata hivyo, baada ya fainali hizo za dunia Puyol alianza kukumbwa na majeraha ya goti yaliyosababisha ashindwe kuwapo katika kikosi cha Hispania kilichoshiriki katika mashindano ya Ulaya 2012.

“Baada ya kufanyiwa operesheni ya goti mara mbili nimekuwa napata wakati mgumu kurudi katika kiwango ninachokihitaji ili niweze kuichezea Barcelona. Kwa hiyo ndiyo maana nimeamua mwishoni mwa msimu huu nitaondoka Barcelona,” alisema Puyol.

Alisema,”Imebakia takriban miezi mitatu kabla ya ligi kumalizika msimu huu kwa hiyo nataka kwa muda huo niendelee kuwa kwenye klabu ya Barcelona.”

Puyol, ambaye alicheza mechi ya 100 akiwa na timu ya taifa ya Hispania Februari 2013 dhidi ya Uruguay, alisema amepanga kupumzika kucheza soka atakapoondoka Barcelona.

“Lakini ukweli sijui nini nitakachofanya baada ya Juni 30 wakati nitakapoondoka Barcelona, ila nina uhakika nitapumzika,” alisema Puyol.

Alisema: “Natarajia nitafanya mkutano na waandishi wa habari mwishoni mwa msimu huu baada ya kuitumikia klabu ya Barcelona kwa miaka 19.”

Hivi sasa klabu ya Barcelona inashika nafasi ya pili katika msimamo wa La Liga ikiwa nyuma kwa pointi moja kwa vinara wa ligi hiyo, Real Madrid.
Source:Mwananchi

Na Mjumbe Jr

Mbeya