HOFU YA KUIBUKA VURUGU JIMBO LA KALENGA.

 

 Ni karibu siku 12 kabla ya uchaguzi mdogo wa ubunge wa Jimbo la Kalenga, zimeanza kuonekana dalili za vitendo vya uvunjifu wa amani baada ya vyama vikuu viwili vinavyokabana koo – CCM na Chadema kuanza kutuhumiana kwa vurugu.

Kutokana na hali hiyo, hofu imetanda miongoni mwa wakazi wa Kalenga kutokana na madai kuwa kila chama kimeingiza watu kutoka nje ya Mkoa wa Iringa kwa lengo la kufanya vurugu kwenye mikutano ya kampeni.

Madai ya Chadema

Mkurugenzi wa Oganaizesheni na Mafunzo, Benson Kigaila aliwaambia waandishi wa habari kuwa walinzi wa chama hicho juzi walimkamata mtu mmoja aliyetaka kuchoma moja ya ngome zao zilizopo katika kata 13 za Jimbo la Kalenga.

Kigaila alisema mtu huyo ni miongoni mwa watu walioletwa na CCM kutoka mikoa mbalimbali ikiwamo Arusha na Dodoma na kwamba watu wengine kwa kazi hiyo jana walikuwa njiani kutoka Mwanza.

“Tumeweka ngome katika kata zote 11 za Jimbo la Kalenga na leo alfajiri (jana) vijana wa CCM walikuja kufanya vurugu kwenye kambi yetu ya Wassa, baada ya mvutano, vijana wetu walifanikiwa kumkamata mmoja wao na taarifa zake zimefikishwa polisi,” alisema Kigaila.

Pamoja na kukamatwa kwa kijana huyo, Kigaila aliwatuhumu wafuasi wa CCM kwa kufanya vurugu, kushusha bendera za Chadema na kuchana picha za mgombea wake, Grace Tendega.

“Tuna ushahidi wa mambo mengi na kesho (leo) tutaweka bayana kila kitu kilichofanyika, na majina ya wahusika wake. Tunataka polisi wafanye kazi yao kuhakikisha wanalinda amani iliyopo,” alisema .

Kigaila alidai vijana wa Green Guard wa CCM kutoka Arusha wakiongozwa na kijana aliyedai anajulikana kwa jina maarufu la Mjusi, tayari wamepiga kambi Ifunda, na kwamba wengine watatu kutoka Mwanza walianza safari yao jana kwenda Kalenga kwa kutumia usafiri wa gari aina ya Toyota Noah.

Katibu wa CCM Mkoa wa Iringa, Hassan Mtenga alikanusha tuhuma kuwaleta vijana kutoka mikoa mingine kufanya vurugu Kalenga.

Shutuma za CCM

CCM nao wamekituhumu Chadema kuwa kimeleta watu wenye silaha na tindikali kutoka nje ya Mkoa wa Iringa kwa ajili ya kufanya fujo kwenye uchaguzi na kuwadhuru wananchi na wana-CCM jimbo la Kalenga.

Na Mjumbe Jr

Mbozi