SHEHENA MENO YA TEMBO ITATEKETEZWA LINI?

Kama tulivyoeleza hivi karibuni katika safu hii, Tanzania inaonekana mbele ya jumuiya ya kimataifa kama taifa ambalo halitambui kwamba kushamiri kwa vitendo vya kuangamiza wanyamapori kutalifanya kuwa maskini milele.

0
inShJumuiya ya kimataifa jana iliadhimisha kwa mara ya kwanza Siku ya Wanyamapori Duniani ambayo iliasisiwa na Umoja wa Mataifa (UN) hivi karibuni kwa lengo la kuyahamasisha mataifa yote duniani kutambua na kuthamini umuhimu wa wanyamapori kwa maisha ya binadamu ili kuweka mikakati na mbinu za kulinda wanyamapori.

Kwa namna moja ama nyingine, hatua hiyo ya UN imeonekana katika macho ya wengi duniani kama inalenga kuishawishi dunia kupambana na vitendo vya ujangili katika sehemu mbalimbali duniani, hasa Tanzania na nchi nyingine kadhaa ambazo zimeshindwa kabisa kudhibiti vitendo vya ujangili na kusababisha mauaji makubwa ya wanyamapori ambao wako hatarini kutoweka, wakiwamo tembo na faru.

Ni jambo la kusikitisha kuona kwamba jina la Tanzania kwa muda mrefu sasa limetawala vichwa vya habari katika vyombo vingi vya habari duniani kutokana na Serikali kushindwa kukomesha vitendo vya ujangili dhidi ya wanyamapori hao walio katika hatari ya kutoweka, ingawa imekiri wazi kwamba inayajua vizuri majangili hayo.

Siyo siri tena kwamba linapozungumziwa tatizo la ujangili, dunia inajielekeza moja kwa moja kwa Tanzania kama marejeo. Kama tulivyoeleza hivi karibuni katika safu hii, Tanzania inaonekana mbele ya jumuiya ya kimataifa kama taifa ambalo halitambui kwamba kushamiri kwa vitendo vya kuangamiza wanyamapori kutalifanya kuwa maskini milele.

Pamoja na kushutumiwa na kusutwa kila kona ya dunia kutokana na kutopambana na ujangili unaosababisha mauaji ya tembo 11,000 kila mwaka, Serikali bado imeshikwa na kigugumizi kutekeleza ahadi yake ya kuteketeza tani zipatazo 90 za shehena ya meno ya tembo yaliyohifadhiwa katika maghala yake baada ya kuzikamata kutoka kwa wahalifu sehemu tofauti. Badala yake imekuwa ikifanya juhudi kwa muda mrefu ikitaka ipewe kibali cha kuuza shehena hiyo, lakini juhudi hizo zimegonga mwamba.

Pengine ni vyema tukakumbuka kwamba hadi miaka ya hivi karibuni, Serikali imekuwa na mkakati wa kuzishawishi nchi zilizosaini Mkataba wa Kimataifa Dhidi ya Biashara ya Wanyamapori na Mimea Iliyo Katika Hatari ya Kuangamia (CITES), ili iuze shehena hiyo katika soko la kimataifa. Pamoja na msimamo wake kwamba fedha hizo zingesaidia katika vita yake dhidi ya ujangili, nchi hizo ikiwamo Kenya zilipinga vikali ombi hilo.

Hali ya nchi kushutumiwa na kuaibishwa kimataifa ilijitokeza pia jijini London wakati wa kongamano lililoitishwa na Serikali ya Uingereza kujadili mbinu za kulinda wanyamapori dhidi ya ujangili. Kongamano hilo lilihudhuriwa na wajumbe kutoka nchi 46, wakiwamo marais wanne kutoka Afrika na wakuu wa mashirika 11 ya kimataifa. Tanzania ndiyo iliyoonekana kuwa katikati ya masikitiko na shauku za wajumbe wa kongamano hilo kutokana na ukubwa wa tatizo la ujangili hapa nchini.

Ni wakati wa kongamano hilo, ndipo ujumbe wa Tanzania ulioongozwa na Rais Jakaya Kikwete ulipotangaza kwamba umefuta mpango wake wa kuuza shehena ya meno ya tembo, pengine ikiwa ni hatua ya kuonyesha kwamba Tanzania sasa inayo dhamira ya kupambana na ujangili na biashara ya meno ya tembo.

Muda mrefu umepita sasa tangu ahadi ya kuteketeza shehena ya meno ya tembo ilipotolewa. Sisi tunauliza: Kama kweli Serikali imedhamiria kupambana na ujangili na kuionyesha dunia kuwa ina dhamira ya kweli, ni sababu zipi zinazokwamisha utekelezaji wa ahadi hiyo?

Chanzo:Mwananchi

Na Mjumbe Jr

Mbozi