Katibu CCM Wilaya ya Mufindi, Miraji Mtaturu akimkabidhi muwakilishi wa timu kijiji cha Mtwango vifaa vya michezo
Na Mathias Canal
Wakati chama cha Demokrasia na Maendeleo CHADEMA kikiendelea na msimamo wake wa kuridhia maandamano ya nchi nzima kwa ridhaa ama bila ridhaa ya polisi, Chama cha Mapinduzi CCM kimeendelea na mikutano mbalimbali kwa muktadha wa kuimarisha chama hicho.
Hayo yamejidhiirisha kwenye mikutano ya chama hicho inayoendelea kushika kasi Wilaya ya Mufindi Mkoani Iringa, ambapo chama hicho kimeendelea kuvuna wafuasi kutoka CHADEMA.
Hata hivyo katika mikutano hiyo Mgeni rasmi ambaye ni Katibu wa Chama Cha Mapinduzi CCM Wilaya ya Mufindi, Miraji Mtaturu, amesema kuwa vyama vya upinzani ambavyo vilikopeshwa majimbo vimeshindwa kurejesha deni hilo kwa nidhamu hivyo kuna kila sababu ya kurudisha majimbo yote ya upinzani kwa hoja na kuungwa mkono na wananchi.
Akizungumza katika na wananchi katika mkutano uliofanyika katika Kijiji cha Nyololo, ambacho kilikuwa ngome ya CHADEMA, Katibu huyo alisema kuwa CCM ni chaguo la wananchi hivyo zawadi waliyoitarajia ni kupatiwa maendeleo ambayo wanayapata kwa sasa kupitia utekelezaji wa ilani ya Chama hicho.
Ili kuwaweka vijana pamoja kwa ajili ya kuachana na Unywaji pombe, Wizi na Ngono zembe, Mtaturu amewapatia Jezi pea moja timu ya Kijiji cha Nyororo pamoja na shilingi 150,000 kwa ajili ya kuunga mkono vikundi vya vikoba kijijini hapo, sawia na timu ya Kijiji cha Mtwango, Kata ya Mtwango, iliyopatiwa jezi pea moja.
Kwa upande wake Katibu mwenezi CCM Wilaya ya Mufindi, Daud Yasini alisema kuwa jezi na fedha zilizotolewa ni utekelezaji wa ahadi iliyotolewa kwa vijana wa maeneo hayo.
Aidha Yasini alisema kuwa vikao na mikutano wanayofanya Wilayani humo ni kueneza Ukombozi wa Fikra kuhusu muktadha wa mwenendo wa nchi na kuimarisha chama, tofauti na vyama vingine vya upinzani ambavyo vinafanya mikutano kwa lengo la kuhamasisha vurugu.
Post a Comment